دەستەی سەربەخۆی مافی مرۆڤ لەسەر قسەو پەیامە توندەکانی دژی ئافرەتان مەلا مەزهەر خوراسانی دەداتە دادگا و دەڵێت، "بەداخەوە مامۆستایەکی ئایینی لە شاری ھەولێر، بە ناوی (مەلا مەزھەر تاھیر)، لە کەناڵێکی میدیایی لێدوانێکی بڵاوکردووەتەوە و بێڕێزییەکی زۆر بە ئافرەتان و ڕۆڵ و پێگەی ئافرەت دەکات".
دەستەی سەربەخۆی مافی مرۆڤ لە ھەرێمی کوردستان رایگەیاند: بەداخەوە مامۆستایەکی ئایینی لە شاری ھەولێر، بە ناوی (مەلا مەزھەر تاھیر)، لە کەناڵێکی میدیایی لێدوانێکی بڵاوکردووەتەوە و بێڕێزییەکی زۆر بە ئافرەتان و ڕۆڵ و پێگەی ئافرەت دەکات. ناوبراو لە ڕوانگەیەکی تەسکەوە ڕۆڵی ئافرەتی کەم کردووەتەوە لە ماڵەوە و وەک خزمەتکارێک وێنای کردووە کە ئەرکەکەی تەنھا لە ماڵەوەیە.
ئاماژەی بەوەشداوە: ئەو وتانەی ناوبراو بە تەواوی دژی بنەمای ئایینەکانە، وپێچەوانەی بنەماکانی مافی مرۆڤ و شکۆی ژنانە؛ بۆ ئەو مەبەستە دەستەی مافی مرۆڤ لە ڕێگەی داواکاری گشتییەوە ئەو کەیسە دەجوڵێنێت و ناوبراو ڕووبەڕووی یاسا دەکاتەوە لەبەر ئەوەی وتەکانی مەلا مەزھەر دژی ماددەی ١٤ی دستوری عێراقە کەئەم ماددەیە بەڕوونی باس لە ئەوە دەکات کە یەکسانی ھەیە لەبەینی ژن و پیاو.
دەشڵێت: جگە لەوەش ھیوادارین وەزارەتی ئەوقاف و یەکێتیی زانایان ڕێکاری پێویست بگرنە بەر بەرامبەر ئەو کەسانەی پێشێلکاری بەرامبەر خەڵک دەکەن لە ژێر ناوی ئایین و مینبەرەکانەوە.
لە کۆتایدا دەستەی سەربەخۆی مافی مرۆڤ جەخت لەوەدەکاتەوە: بەتوندی دژی ئەو جۆرە لێدوانانەین و ئیدانەی دەکەین، بە ڕێزەوەش ڕۆڵی ژنان سەیر دەکەین و بەرز دەنرخێنین.
|