محەمەد شیاع سودانی، سەرۆکی ئەنجومەنی وەزیران ئەمڕۆ سەرۆکایەتیی کۆبونەوەیەکی تایبەتی کرد بۆ تاوتوێکردنی زیادکردنی داهاتە نانەوتییەکان بە ئامادەبونی تەیف سامی، وەزیری دارایی عێراق و چەند بەرپرسێكی دیكە. كە تاوتوێی بەکارهێنانی تەکنەلۆژیای نوێ، و میکانیزمە دیجیتاڵی و ئۆتۆماتیکییەکانی کرد.
نوسینگەی ڕاگەیاندنی سەرۆکی ئەنجومەنی وەزیران لە ڕاگەیەندراوێكدا بڵاویكردەوە، محەمەد شیاع سودانی، سەرۆکایەتیی کۆبونەوەیەکی کرد کە تایبەت بو بە تاوتوێکردنی ڕێگاکانی بەردەوامبون لە زیادکردنی داهاتە نانەوتییەکان، و پشتگیریکردن و بەهێزکردنی سەرچاوە داراییەکانی دەوڵەت.
بەگوێرەی ڕاگەیەندراوەكە، کۆبونەوەکە تاوتوێی بەکارهێنانی تەکنەلۆژیای نوێ، و میکانیزمە دیجیتاڵی و ئۆتۆماتیکییەکانی کرد لە زیادکردنی داهات و پشتگیریکردنی ئەو پڕۆژانەی کە داهاتیان بەرزە.
هەروەها سەرۆکی ئەنجومەنی وەزیران جەختی کردەوە کە گەشەپێدانی ئابوری دەبێت لە ڕێگەی وەبەرهێنانی نمونەیی پارەکانەوە بێت لەو شوێنانەی کە داهاتیان بەرزە، و دانانی پلان بۆ بەفیڕۆنەدانی خەرجی و کەمکردنەوەی بەهەدەردان.
|