روانگەی ئابوری "ئیکۆ عێراق" ئاشکرای دەکات کە بەرھەمھێنانی نەوت لە ھەرێم گەیشتووەتە ١٢٠ ھەزار بەرمیل لە رۆژێکداو پێشبینی دەکات تا کۆتایی مانگی ئابی داھاتوو، تێکڕای بەرھەمھێنان بگاتە ٢٨٠ھەزار بەرمیل لە رۆژێکدا
روانگەی ئابوری "ئیکۆ عێراق" ئەمڕۆ سێشەممە لە بەیاننامەیەکدا رایگەیاندووە: بەرھەمھێنانی نەوت لە ھەرێمی کوردستان بۆ ١٢٠ھەزار بەرمیل لە رۆژێکدا بەرزبووەتەوە، دوای ئەوەی بەھۆی کردنە ئامانجی کێڵگە نەوتییەکانی لە ماوەی رابردوودا بۆ ٨١ھەزار بەرمیل لە رۆژێکدا دابەزی.
ئاماژەی بەوەشداوە: لە ئەنجامی ئەو ھێرشانەی کە ژێرخانی نەوتیان کردە ئامانج، بەرھەمی ھەرێم بۆ٨١ ھەزار بەرمیل لە رۆژێکدا دابەزی، بەڵام لە چەند رۆژی رابردوودا بوژانەوەی بەخۆیەوە بینیوەو، بەرھەمھێنان بۆ نزیکەی ١٢٠ھەزار بەرمیل بەرزبووەتەوە.
روانگەکە لە راگەیەدنراوەکە ئەوەشی وتووە: پێشبینی دەکرێت تا کۆتایی مانگی ئابی داھاتوو، تێکڕای بەرھەمھێنان بگاتە ٢٨٠ ھەزار بەرمیل لە رۆژێکدا، ئەم ئاستە نزیکە لە ئاستی بەرھەمھێنانی پێش ھێرشەکان.
لە کۆتایدا دەڵێت: تا ئێستا ھیچ رێککەوتنێک لە نێوان وەزارەتی نەوت و ھەرێم نەکراوە، سەبارەت بە کاتی بۆ دەستپێکردنەوەی ھەناردەکردنی نەوت لە کوردستانەوە.
|