محه‌مه‌د شیاع سودانی، سه‌رۆك وه‌زیرانی عێراق رایگه‌یاند، ناردنی 700 ملیار دیناره‌كه بۆ پاره‌ی موچه‌ی فه‌رمانبه‌رانی هه‌رێمی كوردستان تا كۆتایی ئه‌مساڵ به‌رده‌وام و به‌م نزیكانه گوژمه‌یه‌كی دیكه ره‌وانه ده‌كرێت.
محه‌مه‌د شیاع سودانی ئێواره‌ی ئه‌مڕۆ دوای كۆبونه‌وه‌ی ئه‌نجومه‌نی وه‌زیرانی عێراق له‌میانی كۆنگره‌یه‌كی رۆژنامه‌وانیدا، ڕایگەیاند به‌م نزیكانه شاندی حكومه‌تی فیدڕاڵی و حكومه‌تی هه‌رێم په‌یوه‌ست به پرسی موچه‌ی فه‌رمانبه‌رانی هه‌رێم كۆده‌بنه‌وه و تا كۆتایی ئه‌مساڵ مانگانه 700 ملیار دینار بۆ موچه ره‌وانه‌ی هه‌رێم ده‌كرێت و له‌مانگی 12ی ئه‌مساڵیشدا پاكتاوی دارایی له نێوان هه‌ردولادا ده‌كرێت.
ئاشكراشیكرد، دیوانی چاودێریی دارایی عێراق و هەرێم راپۆرتی خۆیان لەبارەی وردبینی لە لیستی مووچەخۆرانی هەرێمی كوردستاندا ئامادەكردووە.
|