كرێی خوێندنی دبلۆمی باڵا و ماستەر و دكتۆرا لە عێراق دیاریكرا

وەزارەتی خوێندنی باڵا و توێژینەوەی زانستی عێراق ئەمڕۆ سێشەممە كرێی ساڵانەی خوێندنی باڵای لە زانكۆ ئەهلیەكان و زانكۆ و پەیمانگاكانی ئێواران دیاریكرد.

میللەت:

ئەمڕۆ سێشەممە29ی ئاب، حەیدەر عەبودی، وتەبێژی خوێندنی باڵا و توێژینەوەی زانستی ئاشکرایکرد، وەزارەتەکەیان کرێی ساڵی 2023-2024 بۆ ئەو خوێندکارانە دیاریکرد کە بە پارە دەخوێنن، بەتایبەتی ئەوانەی ساڵی ڕابردوو بەردەوام بوون لە خوێندن لە زانکۆ و پەیمانگاکان بۆ پسپۆرییە مرۆیی و زانستییەکان.

ئاماژەی بەوەشكرد، بڕە پارەی خوێندنی مرۆیی بە دو ملیۆن و 250 هەزار دینار بۆ خوێندنی دبلۆمی باڵا و سێ ملیۆن دینار بۆ خوێندنی ماستەر و سێ ملیۆن و 750 هەزار دینار بۆ خوێندنی دكتۆرا دیاریكراوە.

وتەبێژی وەزارەتی خوێندنی باڵا و توێژینەوەی زانستی ئەوەشیخستەڕوو، سەبارەت بە كرێی خوێندنی زانستی، سێ ملیۆن بۆ بڕوانامەی باڵا و سێ ملیۆن و 750 هەزار دینار بۆ ماستەر و چوار ملیۆن و 500 هەزار دینار بۆ خوێندنی دكتۆرا دیاریكراوە.