وەزارەتی تەندروستی لە بڕیارێکی نوێدا، قەدەغەیکردووە چیتر دەرمانخانەکان دەرمان لە نەخۆش وەربگرنەوە، سەندیکای دەرمانسازان دەڵێت، نوسراومان کردووە، بەڵام سەرەتا دەبێت خەڵک پابەند بێت.
میللەت:
د.رەنج محەمەد، سکرتێری سەندیکای دەرمانسازان رایگەیاند، نوسراومان بۆ هەموو دەرمانخانەکان کردووە، بەهیچ جۆرێک دەرمان لە نەخۆش وەرنەگیرێتەوەو، هەموو دەرمانخانەکان پابەندبن.
دەشڵێت، هاووڵاتی هەیە لەگەڵ دەرمانخانەکە کردوویەتی بە شەڕ بۆئەوەی دەرمانەکەی لێ وەربگیرێتەوە، بڕیارەکە هێندە بۆ هاوڵاتیانە هێندە بۆ دەرمانخانەکان نییە.
ئاماژەبەوەشدەكات، وەرگرتنەوەی دەرمان لە نەخۆش زانستی نییە، ئەو دەرمانەی نەخۆش وەریدەگرێت نازانرێت لەماڵ چۆن پارێزگاری لێکراوە، کاتێک دەدرێتەوە بە نەخۆشێکی دیکە سوودی لێ وەرناگیرێت، داوامانکردووە تەنانەت ئەگەر دەرمانەکە لە دەرمانخانەکەش بردرایە دەرەوە وەرنەگیرێتەوە.
د.رەنج محەمەد ئەوەشدەخاتەڕوو، داوامان لە سەندیکای پزیشکان ئەوەیە پزیشکەکانی خۆیان ناچار بکەن هێندە دەرمان بۆ نەخۆش نەنوسن، ماوەی پێدانی دەرمانەکان با هێندە بێت کە دواتر لەسەری بکڕێتەوە، نەوەک پێنج پاکەتی بۆ بنوسێت و دواتر سێ دانەی بمێنێتەوە دەیهێنێتەوە بۆ دەرمانخانە و داوا دەکات لێی وەربگیرێتەوە، ئەگەر دەرمانخانەکە لێی وەرنەگرێتەوە فڕێی دەدات و ئەوەش کێشەیەکی دیکەیە بۆ ژینگە.
|