چاویان لە میراتی یەکێتییە... وەک بڵێی ئەم سامانە نەتەوەیی و نیشتمانییە بێخاوەن بێت و کەس لەسەری نەیەتە جواب.
لە کاتێکدا هەزاران هەزار کەسوکاری شەهید و پێشمەرگە و تێکۆشەری دێرین خاوەندارێتی لێدەکەن و رویان لە دەباشانە بۆ پاراستنی ئەم کەلتورە دەوڵەمەندەی مام جەلال.
ئەم ناپەسەندانە بە ناهەق چاویان لە میراتی حەڵالی یەکێتییە، بەڵام قودرەتی خوا گەورەترە لە قودرەتی ئەوان،
ئەوان رێبواری کاتی ئەم دونیای فانیەن، بەلام خوا باقی و ئەزەلییە.
قودرەتی خوا لە هی ناوبراو بە (رێبوار قودرەت) و رەفیقە قەناس بەدەستەکانی بەهێزترە. کورد لەمێژە گووتویەتی خوا لە سوڵتان مەحموود گەورەترە.
ئەمە لە کتێبەکانی مێژوودا هاتووە و حیکاتەکانی رۆژهەڵاتێش دەمێکە دەیگێرنەوە. دەمێکە نەفرەتیان لەم (نەفرەتی بەرامیکە) کردووە.
لەعنەتی کورسی حەرام و سەڵتەنەتی داگیرکاری و زەوتکردنی نابەجێ.
بەڵام ئەمانە کوا دەخوێننەوە؟
ئەمانە کوا ئاگایان لە مێژووە؟
کوا ئاگادارن ئەم یەکێتییە چۆن هاتووە و چۆن دامەزراوە و چۆن پەنجا ساڵە لەسەر هێڵی گەرمی کوردایەتی خەبات و کۆشش دەکات؟
ئەمانەی تەماحیان کردۆتە کەلتور و میراتی شۆرشی نوێ، چووزانن مام جەلال و رەفیقەکانی چۆن بەلاغی دامەزراندن و پەیامی مەفرەزەکانی پروپاگەندەی چەکدارییان نووسی؟ چۆن پەیڕەو و پرۆگرامیان دانا و نامیلکەی جۆشدانەوەی خەباتیان چاپکرد؟
ئەمجارە سەیرنییە لە کۆیە و سەیرە لە لالەزار، ئەمانە چاویان بڕیوەتە تەلاری بەرزی یەکێتیی و وادەزانن بە درۆ و درۆن دەتوانن ئەسپەشێی ( یەکێتیی نیشتمانیی کوردستان بۆچی ؟) ڕام بکەن؟
ئەم ناوە غەریبانە لە کوێوە پەیدابوون؟ لە کوێی وێستگەکانی خەباتی یەکێتیی لە پێش راپەڕین و لە دوای راپەڕین ناویان هاتووە و ئەنکێتیی ئەندامێتیان پڕ کردۆتەوە؟
سەلمان و عومەر و ئوسامە و نازانم کێ و کێ دەبنە شەریکە بەشی تاوانی کوشتنی سەرۆکی هەڵبژێردروای یەکێتیی نیشتمانیی کوردستان؟
ئەم غەریب و نەناسانە لە کوێوە پەیدابوون کە جورئەت بکەن و هەوڵی کوشتنی دوو کوڕی مام جەلال بدەن؟
بە راستی ئۆینی مێژوو زۆر قوڵە، بەڵام ئەم رەوتەیانی جێی سەرنجە ؟
یانی مام جەلال زیاتر لە نیو سەدە بۆ ئەو کوردستانە خەباتی کرد، کە دوای خۆی بە قودرەتی پیلانگێڕان دوو کوڕی بکوژرێت؟
یانی دیموکراسی و گۆرانکاری لەوەوە دەستپێدەکات کوڕی مام جەلال بکوژرێ؟
هەندێک، زۆریش نا ، کتێبی ئەزموونمان خوێندۆتەوە، بۆیە دەپرسین
لەکام کتێبی دیموکراسی و کتێبی وڵاتی ئازادیدا ئەم شتە عەنتیکەیە جێی بۆتەوە؟
گوایە کابرا حزبی خۆی هەیە کەچی خەیاڵی هەر لای هەڵکوتانە سەر یەکێتییە.
خەیاڵی هەر لای دەباشانە. خەیاڵی هەر لای چەک و تەقمەنی دووپشک و درۆنی پاڵپشتی نەیاری یەکێتییە.