ئەمڕۆ ڕاگەیەنرا کە عەجاج گیراوە ، پێرێ شەو ھەواڵەکەیان پێدام و داوای ئەوەش کرا جارێ باس نەکرێت ، ھەڵبەت چەند گەواھیدەرێکیش ڕۆژانی بەرێ چووبوون بینیبویان ، عەجاج لەم ھەموو ساڵەدا چەندین شوێنی کردوەو نەشتەرگەری جوانکاریشی کردوە کە نەناسرێتەوە، ساڵی ٢٠٠٣ چەند میدیاکارێک عەجاجیان بینیبوو، گفت و گۆشیان لە گەڵ کردبوو ، بەڵام دواتر ئەو بابەتەیان شاردەوە و باس نەکرا ، من خۆم چەند جارێک داوای دیدارەکەم کرد پێم نەدرا تەنانەت داوای ئەوەم کرد وێنەیەکم بدرێتێ، ئەوەشیان بە بیانوی دیار نەبوونەوە پێنەدام .
لە ساڵانی ڕابردودا چەند جارێک ھەواڵی مردنی بڵاو بوەوە، ھەموو جارێکیش ھەواڵەکە بە درۆ دەخرایەوە ، ئێمە تیمێک بووین لە ساڵی ٢٠٠٣ سۆراغی زۆری ئەومان کرد ، بەڵام شتێکی ئەو تۆمان دەستنەکەوت ، عەجاج جەلادی ھەرە دیاری نوگرە سەلمان بوو، قوربانیەکان ھەمیشە لە گەڵ ناوی عەجاجدا ناوی سەگە ڕەشەکانی بیابانیشیان دەھێنا ، نزیکی دوو ساڵێک لەمەوبەر لەبەغدا بووم لای مزگەوتی شێخ عەبدولقادری گەیلانی ، ناسیاوێک یەکێک لە جاشە خوێنڕێژەکانی کوردستانی نیشاندام ، کە لەوێ خۆی وەک موسوڵمانێکی عەیارە بیست و چوار نیشاندەدا ، بە داخ بووم لەوەی کەماوە، لە گەڵ چەند دۆستێک باسی ئەوەم کرد کە نەدەبوو ئەو جەلادە لە ژیاندا بێت ، برادەرێک وتی تۆ چی دەڵێیت خۆ عەجاجیش لە ژیاندایەو کەسیش پێی ناڵێت پشتی چاوت برۆیە .
ئێستا کە عەجاج گیراوەو ڕۆژی ڕاگەیاندنی گرتنەکەی کەوتە ڕۆژی جینۆسایدی بارزانیەکانەوە، زۆر گرنگە دادگای بکرێت ، من پێرێ شەو بەو دۆستەم وت ھەقە داوابکرێت بھێنرێتەوە بۆ کوردستان و لێرە دادگای بکرێت، وتی نەکەی لە ڕێی خودا پێشنیازی وانەکەیت ، نەبا وەک بەرزەکی بانان بۆی دەرچێت ، بیرم لە قسەکەی کردەوە کە یەک ئامر مەفرەزەو موستەشار دادگای نەکراو پارتی و یەکێتی تەنانەت پاکانەیان بۆ جەلادەکانی بەعس دەکرد وتم دیارە ئەو ئەو قسەیە لە خۆیەوە ناکات .
ھیوادارم بەر لەوەی عەجاج تووشی ھەر ڕٍوداوێک بێت ھەموو ئەو زانیاریانەی لایەتی لێی وەربگیرێت ، بەتایبەت کوشتنی ئەو سەدان کەسەی قەڵای سەلمان ، کە من خۆم لیستێکم لایە ھەموویان یەک ھۆکار بۆ مردنەکەیان نوسراوە، ئەو لیستە ئەوانەن کە نەخۆشخانەی سەلمان ناوی نووسیون ، نەک ئەوانەی لەناو قەڵاکە مردون و ھەر لەو دەورو بەرە خراونەتە نێو خۆڵی بیابانەوە .